Prezidentan grantufondan projektutoimisto avatah Karjalah
Artur Parfenčikov Moskovas piettylöin Karjalan tazavallan päivien aigah ilmoitti, ku Karjalah avatah Prezidentan grantufondan projektutoimisto. Karjalan halličus da Prezidentan kul’tuurualguhpanoloin fondu allekirjutettih sobimus yhtehizes ruavos.
Parfenčikovan sanoin mugah yhtehine ruado fondan kel andau suurembat mahtot todevuttua projektoi, kudamien vuoh säilytetäh Karjalan kul’tuuruperindyö, kehitetäh nygyaigazii taidokeinoloi da eistetäh tazavallan kul’tuurua federuallizele tazole.
— Sobimuksen allekirjutus on tärgei tapahtumu. Myö ylen kingiesti ruammo fondan kel da jatkammo sidä ruaduo, kudai andau ližiä mahtuo tazavallan kul’tuuran kehittämizekse, sanoi Karjalan piämies omassah lehtistöpalvelule.
Prezidentan grantufondan piälikkö Roman Karmanov korosti fondan merkičysty paikallizien alguhpanoloin kannatuskeinonnu.
— Kreatiivupotensiualu Karjalas on ylen suuri. Meijän yhtehine tavoiteh on auttua sille avavuo uudeh luaduh, sanoi Karmanov.
Prezidentan grantufondu on kannatannuh Karjalas 138 projektua, niilöih on annettu 250 miljounua rubl’ua. Projektujoukot suadih projektoih ližäkse vie enämbän 350 miljounua rubl’ua. Meijän tazavallaspäi oli työtty 893 zajavkua Prezidentan grantufondan kilbah. Fondan 16. kilvan tulokset ilmoitetah sulakuus. Mennyt vuon Karjalan tazavaldu työndi kilbah kahten suuren tapahtuman zajavkat: syvyskuus piettävy Robert Roždestvenskoin nimelline muuzikkurunohusfestivuali da kanzoinväline muuzikkufestivuali Ruskeala Symphony, kudai pietäh 17.—18. heinykuudu.
Aihies voit lugie suomeksegi.
Yhty Oman Median kanualah Telegramas!
