Kaks’ kud lebupäivin mäniba ”Kebnas-ik sanuda?!”-karjalan da vepsän keliden openduzkursad. Nügüd’ ned lopihe i openikoil oliba ekzamenad. Kel’kursiden ühthevedoid tehtihe openduzlopindpraznikal, miččen tegiba projektan ohjandajad kursiden pästnikoiden da opendajiden täht.
Openikoid varasti mastar’-klass kalitoiden vaumičendan mödhe i melenmahtoine vänd ”Kašal’pä”, miččel kursiden ühtnikad ozutiba ičeze tedoid da mahtoid, miččid hö saiba kursil. Praznik lopihe penel kocertal. Kaik kel’kursiden ühtnikad saiba diplomad i lahjad.
— Eht mäni lujas hüvin. Iče openikad vaumičiba melentartuižid nomeroid. Oli kel’vänd, miččen aigan hö ozutiba hüvid vepsän i karjalan kel’tedoid. Tegendad oliba erazvuiččed. Oli tegend, kus karjalaižele pidi el’geta vepsän paginad. Kaik hüvin päzuiba neniš kodvusišpäi, sanub üks’ projektan avtoroišpäi Galina Baburova.
— Nece ihastoiti meid, sikš ku ristitud tuliba opendamha kel’t ani augotišespäi i nügüd’ hö voiba ei vaiše sanuda midä-se kelel, no el’geta heimkelid-ki, sanub Baburova.
Karjalan rahvahan sebran ”Opendamoiš ühtes”-projekt jatktase. Om kuvatud 30 videourokad, kus Petroskoin eläjad opendaba karjalan kelen livvin da pohjoižkarjalan paginoid i vepsän kel’t. Edel om videomontaž, mugažo tehtas ühtnikoiden videoezitused i vaumhiden videourokoiden prezentacii.