Pakkaiskuun 6. ta 7. päivän välisenä yönä Roštuon pruasniekkana Aleksanteri Nevalaisen piäkiriköššä Petroskoin ta Karjalan mitropolitta Konstantin piti Roštuon jumalanpalvelušta.
Jumalanapalvelukšeh otettih ošua piäkirikön papit ta kuoro. Seremonijan aikana mitropolitta Konstantin luki malittuja, muun muašša liäkärinalan ruatajista, kumpaset täytetäh omie velvollusukšie pandemijan vaikiena aikana.
Piäkirikön protopappi Ioann Teren’ak ilmotti Moskovan ta koko Venäjän patriarhi Kirillin Roštuon viestin arhipastoriloilla, pastoriloilla, diakoniloilla, manahhoilla ta Venäjän pravoslavnoin kirikön jäšenillä.
Piäkirikön pappi Jevgenii Barišev ilmotti Petroskoin ta Karjalan mitropolitta Konstantinin viestin arhipastoriloilla, pastoriloilla, diakoniloilla, manahhoilla ta Karjalan jeparhijan kirikköhkävijillä.
Liturgijan lopušša mitropolitta Konstantin onnitteli pappija ta kirikköhkävijie.
— Roštuo on tosi šuuri tapahtuma, kumpani tapahtuu meijän pienellä Mua-planetalla. Meijän on tuotava omie antija Jumalalla: hyvie ruatoja, kirikön malittuja, ihailuo. Toivotan teilä Jumalan apuo ta tukie, korošti mitropolitta Konstantin Roštuon onnittelušša.