Pohjoižvepsläižiden röun Karjalan taidehpirdajiden sil’mil
Karjalan Rahvahaližes teatras radab “Matk pohjoižvepsläižidennoks” -ozuteluz, mitte oli tehtud art-ekspedicijan taguiči vepsän male.
Ozutelusel om ezitadud Karjalan ühesan taidehpirdajan kuvad. Sigä om londuzkuvid, arhitekturan kuvid, mel’kuvitelusid vepsläižele temale. Taidehkuvadjiden ekspedicii jatkui nel’l’ päiväd. Hö oliba Šokšus, Kvarcitnijas, Šoutjärves, Mägel, Toižeges, Kalages da Kaskezas. A nügüd’ taidehpirdajad ezitiba kacujile sidä, midä libuti heiden henged.
— Mö äjan ajelim, äjan nägištim. Meile ozastui süveneda vepsläižehe kul’turaha, tundištadas sijaližiden ristituidenke. Päazjan om se, miše kerazim materialad — mel’kuvid da tundmisid, miččid toim kerdale kodihe i miččidenke sid’ radoim, sanui ekspedicijan ühtnik, “Venäman taidehpirdajiden sebran” Karjalan erišton pämez’ Vladimir Zorin.
“Matk pohjoižvepsläižidennoks” -ozuteluz radaškandeb Karjalan Rahvahaližes teatras redukun 13. päivähasai. Ozuteluz om vaumištadud “Joksmust vaste. Pohjoižvepsläižed” -projektan aigan.
