Venäman pälidn varastab adivoid Pohjoižen kal’huded – jarmark-ozutelusel. Kaikuččen voden Pohjoižen, Sibirin da Edahan Päivnouzman igähižed rahvahad voiba ozutada sil ičeze radonmahtod, käzitöd da sädod. Sur’ jarmark mäneb Moskvan Sokol’niki-parkas.
Karjalan rahvahad mugažo ühtneba necile ozutelusele joga voden. Täl kerdal Karjalan delegacijaha mülüiba Radomahtoiden keskuz, Šoutjärven muzei da Vepsän rahvahan hor.
Tradicijan mödhe Periodika-paindišton radnikad ezitaba kirjad, miččed om paindud Periodika-paindištos suomen, karjalan da venän kelil i starinoičeba ristituile Karjalan rahvahiš da kul’turas.
— Om čoma, miše mugoine sur’ ristituiden lugumär kaikuččel Venämalpäi voib tundištadas pohjoižen rahvahidenke da kul’turanke. Muloi minä ezitin jarmarkal Periodika-paindišton kirjad. Voin sanuda, miše ristituil oli sur’ melentartuz kirjoihe, sanub Kodima-lehtesen toimitai Maria Košeleva.