Podporožjes mäni Nikolai Abramovale omištadud festival’
Männuden pätničan Podporožjen rajonan keskuzkirjištos mäni “Nikolai Abramovan pirdaižed” -regionoidenkeskeine festival’. Sille kerazihe tetaban vepsläižen runoilijan heimolaižed da läheližed, sebranikad, ühtesradnikad, hänen sädandan navedijad. Täl vodel Nikolai Abramovale — runoilijale, kändajale, fotokuvadajale da žurnalistale — täuduiži 65 vot.
Festivalin programm oli ani bohat: sihe mülüiba vastused melentartuižidenke ristituidenke, čomad ozutelused, literaturižed adivhonused, lekcijad, vepsän kelen urokad da mastar’-klassad. Adivoiden keskes oliba Nina Zaiceva, Dmirtii Bakulin, Dmitrii Gridin, Maksim Kuznecov, Viktor Trifojev, Vladimir Jetojev, Nadežda Fokina, Galina Aleksahina da äi toižid.
— Nikolai Abramov enamba 20 vot radoi “Kodima”-lehteses — oli korrespondentan, toimitajan da pätoimitajan. Hänen panend vepsläižehe kul’turaha da kel’he om ani jüged surendelda. Hüvä, miše tehtas mugoižid azjtegoid. Sur’ spasib Podporožjen kirjištole čomas festivališ, sanui “Oma Media” -portalale festivalin ühtnik Irina Sotnikova.
Kirjišton ezizal oli čomitadud erazvuiččil sädandradoil. Adivoil oli voimuz kacta Dmitrii Gridinan “Abramovan pirdaižed” -ozutelusen kuvihe, Nikolai Abramovan kirjoiden erazvuiččihe painusihe. Mugažo ezizalas oli “Männuden kezan pirdaine...” -foto-ozuteluz, miččel oli 115 fotokuvad 73 mehilpäi 6 regionaspäi. Nene fotod oli tehtud Nikolai Abramovan runoiden motivoile da temoile. Ani melentartuine oli “Elonpu”-londuzinstall’acii — käzil tehtud pu, miččehe kaikutte tahtnik voi sidoda lentaižen.
“Nikolai Abramovan pirdaižed” -regionoidenkeskeine festival’ tehtihe čomaks voimuseks johtutada lahjakahas runoilijas, jagatas muštlotesil da rižada hänen runoiden süvut.
Tarkištele "Oma Median" Telegram-kanalad!
