Piterin agjas mäneb ekologižiden lapsenfil’moiden festival’
15. redukud Piterin agjan Volosovo-lidnas mäneb “Venäman ekologižiden lapsenfil’moiden päiv”, miš tedotadas Karjalan londusen ministerstvan oficialižel VKontakte-lehtpolel.
Nece om unikaline festival’-konkurs, mitte ühtenzoitab norid fil’moiden tegijoid kogonaižel Venämalpäi. Festivalin pätegend om starinoita norištole londusen da ekologijan polhe, kingitada homaičust ümbrišton problemoihe. Azjtegon sädajad uskoba sihe, miše fil’moiden tegend abutab kazvatada vastusenpidäjid, londusen navedijoid ristituid.
— Ühtnemaha festivalihe kuctas Karjalan-ki školiden da uläopistoiden openikoid. Pakičusid voib oigeta lapsiden da norišton fil’mstudijoilpäi, školiden foto- i videosebroilpäi, a mugažo ičenaižiš fil’moiden tegijoišpäi, kudambad oma 16-voččed da norembad, sanutas tedotuses.
Ičeze fil’moiš tariž starinoita ümbrišton varjoičuses. Fil’m ei voi olda pidemba 5 minutad da vanhemba 3 vot.
Tehta fil’moid da oigeta pakičusid festivalile voib sügüz’kun 8. päivähasai.
Ližatedoid festivališ voib sada sen VKontakte-lehtpolel, sigä-žo voib küzuda konkursas.
Vodel 2026 “Venäman ekologižiden lapsenfil’moiden päiv” tehtihe “Ekologine hüvä elo” -valdkundaližen projektan oficialižeks partn’oraks.
Tarkištele "Oma Median" MAX-kanalad!
