Piteriš pagištas Pohjoižen naižen roliš valdkundan da rahvazkundan elos
Piteriš 5.—7. päivil kezakud mäneb ezmäine Pohjoižen naižiden forum. Sihe ühtneb enamaba 500 mest erazvuiččiš Venäman agjoišpäi. Forumale kerazihe vähäluguižiden igähižiden rahvahiden ezinikad, azjtedajad, opendajad, tradicionaližiden käzitöiden mastarid. Foruman aigan radaba paginištundad, kus mel’vajehteldas Pohjoižen rahvahiden elontahoiden kehitoituses, tradicionaližen kul’turan da kodikeliden kaičendas, kanzan kal’huziš, naižen rolin vahvištoitandas.
— Naižiden forum om hüvä voimuz tundištadas toižiden agjoiden mahtištonke, tedištada heiden problemoid, satusekahid radmahtoid meiden ezitatoiden, tradicijoiden, keliden, kul’turan, elontahoiden kehitoituses. Mö ezitim Karjalan valdkundan mahtištod vepsän rahvahan kelen, kul’turan, tradicijoiden kaičendas, ozutim, kut om tärged ühtenzoitta valdmehišton, biznesan da rahvazkundan väged, miše sada korktoid satusid da znamasižid sabustusid rados, sanub Vepsän kul’tursebran pämez’ Larisa Čirkova.
Foruman aigan mäneba ”Pohjoižen tervhuz’ da čomuz’”-festival’, erazvuiččed mastar’-klassad, ozutelused, miččed om omištadud Pohjoižen, Sibirin da Edahaižen Päivnouzman naižile.
Johtutam, Foruman tegii om Pohjoižen, Sibirin da Edahaižen Päivnouzman igähižiden vähäluguižiden rahvahiden associacii.
