Piteriš om tehtud programm, mitte tundištab karjalan kelen livvin paginad
Venäman Tedoakademijan Piterin Federaližes oppindkeskuses om tehtud programm, mitte tundištab karjalan kelen livvin paginad audiofailoiden mödhe. Sen polhe TASS- tedotuzagentstvale starinoiči Venäman opendusen da tedon ministerstvan press-služb.
Tulijal aigal programm kändaškandeb paginad realižen aigan režimas. Programm linneb onlain-kändajan palan.
— Mö tegim programman, mitte tundištab karjalan kelen livvin paginad. Karjalan kelen opendamine om lujas tärged kul’turjäl’gendusen kaičendan da nügüdläižen kävutoitandan täht, sanui Venäman Tedoakademijan Piterin Federaližen oppindkeskusen pätedoradnik Irina Kip’atkova.
Tedomehil keratud tedod kaitas eriližel serveral. Se andab voimusen paremboita tegointellektan radod da kaita azjbumagoiš karjalan kelen livvin paginan ozutesid. Nügüd’ nece programm om ližaduz tedomašinan täht, mitte tundištab änid, a sid’ kändab niid. Tulijal aigal programm linneb smartfonoil, miše sidä voižiba kävutada ei vaiše tedomehed.
Projekt tehtas Venäman tedofondan grantan tugel. Projektan ühtnikoiden lugetišhe mülüiba Venäman Tedoakademijan Karjalan tedokeskusen radnikad.
Uzišt neciš temas voib lugeda mugažo suomeks da karjalaks.
