Järvitaimenien šäilyttämini villiluonnošša on uuvven PRO TROUT -projektin tarkotuš. Šitä varoin pitäy tarkaštua kalaššušta Piäjärvellä, jotta še olis ekologijan kannalta turvallista ta taimen-laji šäilyis.
Vuuvvešta 2010 tuon kalan miärä rupesi jyrkkäh laškomah. PRO TROUT -projektin šuunnittelu alko 2015 vuotena ta tänä vuotena projekti starttasi. Kalan miärä on jatkuvašti vähennyn 2000-lukujen alušta.
Šuomen mečäššyš- ta kalaššušinstituutti monta vuotta on tutkin Oulankajovešša taimenien ikyä ta lajin miäryä kutuaikana. Oulanka-jovešša, Kiutaköngäs-košella jo 55 vuotta on tarkissettu, äijänkö kalua noušou kutomah. Viime vuotena šemmosta kalua oli vain kuuši, še on vähin miärä koko tutkimukšen istorijašta.
Košen alla kala šuahah veještä, pannah šen šelkäeväh Carlin-merkki ta lašetah jälelläh veteh košen yli. Kalaštajat, kun šuahah šemmosie kaloja, myöššytetäh näitä merkkijä šuavuista kaloista, lähetetäh ne instituuttih ta näin šuau tutkie, kuin äijä kalua on myöštyn kutupaikoista ta kuin šuurekši ne on kašvettu.
Šamoin taimenešta otetah šomun esimerkkijä tutkimušta varoin, jotta tiijuštua missä še šynty ta kuin monta kertua oli kutumatoilla. Nykyaikaset geneettiset tutkimukšet voijah näyttyä näitäki tietoja.
Projektie toteutetah rajan molommin puolin, Karjalašša ta Šuomešša. Kala šyntyy ta kašvau Šuomen jokiloissa, šiitä ruokua eččimäššä luonnon instinktien mukah tämä kala laškou šuurempih järvilöih, mit ollah Karjalan ulkopuolella, šentäh tämän kallehen ta arvokkahan kalan šäilyttämisekši niise ei pie olla rajoja.