Piämies vastavui karjalazien kel
Suojärvel piettävän Karjalan tazavallan päivän hantuzis Karjalan piämies Artur Parfenčikov vastavui Karjalazien X kerähmön vallittuloin nevvostoh kuulujien kel.
Karjalan piämies kiitti nevvostolazii aktiivizes ruavos da yhtehizes toimindas pienien karjalazien eländykohtien infrastruktuuran kehittämizekse da kunnostamizekse.
Vastavukses piettih paginua Karjalan tazavallan piämiehen niilöin käskylöin todevutandas, kudamih nähte paistih tänä vuon tuhukuus pietys vastavukses. Sežo luajittih pietyn ruavon väliaigazii yhtehvedoloi. Sanommo, šeikuittih enzimäzen etnokul’tuurizen Krasnaja gorka -jarmankan piendiä, kudai oli suunnattu karjalazien kanzallizen kul’tuuran, kielen säilyttämizeh da kehittämizeh.
— Pido rodih tärgei Anuksen kanzallizen piirin da kogo alovehen elaijas. Jarmankan hantuzis oli pietty etnoturizman kehittämizen fourumu, etno-objektoin da perindöllizien käzineroloin prezentatsieloi, erilazii ruadopajoi da ozutteluloi. Jarmankan tuloksennu rodih Anuksen kanzallizen piirin pozitiivizen imidžan lujoittamine kanzallizen kul’tuuran säilyttämizen da kehittämizen keskuksennu, sego etnoturizman kehittämizen uuzien mahtoloin levendämine piiris da Karjalan tazavallas, kerdou Karjalazien X kerähmön vallittuloin nevvoston piälikön Inga Gurilovan sanoi Kanzallizen da alovehellizen poliitiekan ministerstvu omassah VK-sivul.
Karjalazien X kerähmön vallittuloin nevvostoh vuvvennu 2024 on vallittu 36 karjalastu, kuduat edustetah Karjalan kaikkii alovehii da piirilöi, sego Petroskoin linnua.
Yhty Oman Median kanualah MAX:as!
