Piämiehen ehotuš: Vuotena 2026 Karjalan koulujen peruškorjaukšen lisätäh 121,8 miljonie ruplua
Karjalan piämiehen ehottamat kohennukšet tašavallan b’utžettilakih enši vuuvvekši ennätetäh lisyä rahotušta alovehen koulujen peruškorjaukšeh. Koulut šuahah 121,8 miljonie rupl’ua. Šiitä kertou Karjalan tašavallan opaššuš- ta urheiluministerijö.
Esimerkiksi, Belomorskin 3. koulu šuau lisyä 90 miljonie rupl’ua. Nyt šiinä pietäh korjauštöitä Nuoriso ta lapšet -kanšallisprojektinrajoissa. Koulušta tulou tärkie kehityšvaihe.
— Pohjosen pitäy muanitella uušie eläjie. Mukavat olot lapšien koulutušta ta eri-ikäsien ihmisien joutoajan viettämistä varoin tuntuvašti autetah šitä, lainuau ministerijö Artur Parfenčikovin šanoja. — Tänä vuotena lopetamma korjauštyöt Kulttuuritalon urheilušalissa, enši vuotena — Belomorskin 3. koulušša. Arktisen rajotukšen anšijošta yritämmä rakentua pihaurheilukenttä.
Kaikkieh šeuruavissa kahešša vuuvvešša Nuoriso ta lapšet -kanšallisprojektin rajoissa peruškorjatah 20. kouluo. Näin vuotena 2026 merkitykšellisešti kohennetah Matrossan, Kepan ta Ušmanan kouluja.
Kakšivuotiseh peruškorjaušohjelmah on liitytty viisi laitošta. Ne ollah Sortavalan 6. koulu, Belomorskin 1. koulu, Petroskoin 48. koulu ta Petrovskii-talo šekä Mujehjärjen koulu. Niijen kohentamini alkau vuotena 2026 ta piättyy vuotena 2027.
Vuotena 2027 šuunnitelmissa on peruškorjata vielä 12 kouluo. Niijen luvušša on Segežan 5. ta 6. koulut, Petroskoin 32. koulu, Helylän 7. koulu šekä Talviojan, Sosnoučan, Viäräkošen, Huapalammin, Kaalamon, Tuokslahen, Pudožgorskii- ta Šal’skii -kylien koulut.
Aihiešta voit lukie niise šuomekši ta vepšäkši.
Yhty Oman Median Telegram-kanalah!
