Piäjärven “Brihat” on paraš Louhen piirin kyykkä-joukko
Oraškuun 29. päivänä Piäjärveššä piettih Louhen piirin kyykkä-pelin joukkojen välini kilpailu. Šen järješti paikallini karjalaini šeura “Vienan virta”.
Piäjärveh peluamah kyykkyä tultih joukot Louhešta, Tunkuošta ta Piäjärveštä. Pos’olkan vierahie tuttavuššettih Piäjärveh, kerrottih, jotta kilpailu on järješšetty Karjalaisien runojen vuuvven rajoissa. Kyykkä-kilpailut avasi Louhen hallinnon etuštaja Jelena Kuikina.
– Kilpailu joukkojen välillä oli jännittynyönä ta šen voittajakši piäsi Brihat-joukko Piäjärveštä, toisella paikalla oli Tunkuon Nuoli-miešjoukko ta kolmannella – Vienan virta -joukko. Parahiksi kyykkä-peluajiksi valittih Čikičev Nikitan ta Buglakov Aleksein miehien kešen ta Bezborodova Nataljan naisien kešen, šelitettih kilpaulujen järještäjät.
Kilpailun jälkeh kaikki ošanottajat tanšittih perintehellista karjalaista kruugua. Näissä kilpailuissa oli vanhoja ta uušie kyykkä-joukkoja. Vienan virta -järještön jäšenet tovotah, jotta enši kilpailukši tulou vielä enemmän peluajie.
