Karjalas lopihe Venäman Kubok sportorijentirovanijen mödhe lunvigoidenke mehiden täht. Se vedetas Karjalas jo toižen kerdan. Petroskoihe tuliba parahimad sportmehed Mokvaspäi, Piterišpäi, Jekaterinburgaspäi, Lipeckaspäi i toižiš lidnoišpäi. Kaiked oli läz 40 mest. Karjalan valdkundad eziti sportjouk, miččehe mülüi kahesa mest.
Venäman Kubkan aigan sportmehiden täht vaumitadihe koume sportmatkad. Ned oliba Petroskoiš, Kurmoila-küläs Sämozero-järvel da Änižröunan Šoutjärves.
— Šoutjärves oli melentartuine sportmatk. Sigä voibištelendan täht oli valitud lujas hüvä taho Änižen randal. Sportmatk lujas kožui skandinavian reljefaha: pedaikangaz, mäthad, tehudet, miččidme kebnas voib ajada invalidan kezrvedimel, čoma londuz. Mugoižid sportmatkoid ei täudu Petroskoiš, sanub voibištelendan ühtnik Karjalaspäi Danila Vasiljev
— Oli viž distancijad, kaikuččel pidi tehta viž tegendad aigaks. Kelle-se oli jüged, kelle-se kebnemba, minei oli kebn, sanub Vasiljev.
Petroskolaine Danila Vasiljev, 11. klassan openik, om äjiden voibištelendoiden vägestai. Hänen vepsläižed jured oma Toižeg-küläspäi. Muloi hän sai Sportmastar’-arvnimen, mülüb Venäman joukoho. Necil voibištelendal hän sai ezmäižen sijan ühthižes medal’kodvuses: kaks’ kuldamedalid i üks’ bronzmedal’.
Sportmehiden pauklahjoičend mäni Šuotjärves. Necil vodel Venäman Kubkan rang oli lujas znamasine – se, ken zaimib miččen-se sijan, sab Sportmastar’-arvnimen.