Tuiskukuun 15.—16. päivinä Karjalan tašavallan kanšallisešša kirjaštošša pietäh XVII Kotišeutuoppiluvennot -tietokonferenššie. Tilaisuon aihiena on “Kotišeutuoppi opaššukšešša, šivissykšeššä, tiijošša”.
Konferenšših ošallistuu tietoruatajie, opaštajie, arhiivojen ta kirjaštojen spesialistija šekä nuorie tutkijie, opaššušlaitokšien studenttija ta aspiranttija Karjalašta ta Valko-Venäjältä.
— Venäjällä vuosi 2023 on ilmotettu opaštajan ta juohattajan vuuvvekši, šentäh meijän konferenšši on omissettu kielišeutuopilla opaššukšešša, šivissykšeššä ta tiijošša. Viettyän tätä konferenššie haluomma näyttyä kunnivoitušta huomattavilla karjalaisilla tietomiehillä Eino Karhulla ta Georgii Kertillä. Tietomiehien 100-vuotisjuhlakši Kanšallisen kirjašton Nimet Karjalan istorijašša -šähköportalissa on luajittu henkilöjen uuši Tietoalan huomattavat ruatajat -ošašto. Šiinä olemma luatin Georgii Kertistä kertojan šivun, kerto avajaisissa kanšallisen ta kotišeutuopillisen kirjallisuon ta bibliografijan johtaja Aleksandr Larionov.
Konferenššin ohjelma on luajittu ottuan huomijoh kulujan vuuvven toisie tärkeitä muistopäivie. Niijen luvušša on Petroskoin 320-vuotisjuhla, Karjalan tašavallan kanšallisen kirjašton 190-vuotisjuhla.
Konferenššissa käsitelläh kirjaštokotišeutuoppie, kanšanopaššušta ta šivissyšta, kotišeututukijie ta tiijonantajie, kieli- ta kirjallisuštietuo, folklorie, istorijua. Lisäkši tilaisuon rajoissa vietetäh pyörietä stolua, kumpasešša vaittelöy kotišeutututkijie ta istorikkoja.
Linkkijä konferenššin šuorah lähetykšeh voipi löytyä tilaisuon ohjelmašta.