Petroskoissa alko Kuorojen kerähmö
Kerähmö alko issunnošta Karjalan kanšallisešša musejošša, missä oli enšimmäisie esittelyjä ta Kerähmön järještäjien ta ošallistujien onnittelupakinoja. Avajaisissa esiinnyttih Karjalan kulttuuriministeri Aleksei Lesonen, Petroskoin konservatorijan dekani ta Karjalan kuorošeuran puhienjohtaja Jevgenija Diga ta Karjalan laulujuhlien taitojohtaja Tatjana Ledn’ova šekä Kerähmön vetäjä Anastasija Popova.
— Petroskoissa kulttuurielämä on korkiella tašolla, kuoroja on äijän ta uušieki ilmeštyy. A Karjalan piirilöissä on toini tilanneh, kanšankuoroja on äijän, ka vähän akatemisie, šentäh kun on opaštajien ta johtajien puuteh. Myö tahomma auttua, vaštautuo ta antua ammatillisie n’euvoja, metodisie materialija. Ratkaissa tämä proplema on Kerähmön tavoiteh, šano Karjalan kuorojen šeuran kanšalaisjärješšön ta VIVAT -poikien kuoron johtaja Anastasija Popova.
Issunnon aikana oli esitetty uuši musiikkitevoš, kumpasen esitti Karjalan yhissetty kuoro. Elämän tie -laulu on omissettu Leningradin šalpaukšen lopettamisen 80-vuotisjuhlalla. Musiikkie šepitti Anastasija Popova L’udmila Tervosen runon mukah. Enši vuotena laulun luatijat tahotah kuvata musiikkivideo.
Kuorojen kerähmön aikana yhtyvehet Petroskoista ta Karjalan piirilöistä ošallissutah käytännöllisih muasteri-oppiloih, kumpasien vetäjinä ollah Karjalašša ta Venäjällä tunnettujen kuorojen johtajat, käsitelläh nykytärkeitä kyšymykšie kanšan ta akatemisen kuoron ruavošša ta esiinnytäh konserttiloissa.
Kerähmön järještäjinä ollah Karjalan kanšantaitehen ta kulttuurialottehien keškuš, Karjalan valtijollini konservatorija, Lapšien kuorokoulu ta Karjalan kuorojen šeura -kanšalaisjärještö. Tapahtuma pietäh Karjalan piämiehen granttien fondin kannatukšella.
