Petroskois vastavuttih suomelas-ugrilazien kul’tuuran tutkijat
Karjalan piälinnas egläi on algavunnuh kogo Ven’an XXI tiedokonferensii ”Bubrihan lugemizet: Ven’an luodehpuolen tiedoaloinvälizet gumanitaarizet tutkimukset”, kuduah yhtyi läs 70 tutkijua. Pido on omistettu Karjalan tiedokeskuksen 80-vuozipäiväle.
Tänä vuon konferensies erinomastu huomivuo kiinnitetäh tiedoaloinvälizih keinoloih, kudamien vuoh tutkitah Ven’an luolehpuolen rahvahien kielii, kul’tuurua da histouriedu.
Konferensieh on yhtynyh kui tundiettuu tiedomiesty, mugai nuordu tutkijua Petroskois, Moskovas, Murmanskas, Sankt-Peterburgas, Kazanis, Smolenskas, Siktivkaras, Voulogdas, Sevastopol’as, Tveris, Jekaterinburgas, Kolomnaspäi.
Konferensien enzimäzenny ruadopäivänny Ven’an tiedoakadeemien Piiterin tutkimuskeskuksen ruadai Irina Kip’atkova kerdoi avtomuattizes sistiemas, kudai muuttau karjalankielizen paginan ven’ankielizekse kirjutetukse tekstakse.
— Luajimmo moizen sistieman karjalan kieleh nähte, ku meil on hyvii yhtevyksii Petroskoin da Karjalan tutkijoih, heijänhäi abuu pidi sistiemua luadijes da ”opastajes”. Toizekse, Piiteri da Karjal ollah lähäl, sendäh mieleh juohtuigi karjalan kieli, sanoi Oma Mediale Irina Kip’atkova.
Avtomuattistu sistiemua karjalan kieleh ”opastajes” piiteriläzet tutkijat käytettih petroskoilazien Verso- da Periodika-julguamoloin painoksii karjalan kielel.
Petroskoin yliopiston opastui Damil Kolganov yhtes Kielen, literatuuran da histourien instituutan ruadajan Aleksandra Rodionovan kel ezitettih sistieman, kudai muuttau käil kirjutettuloi karjalankielizi tekstoi tidokonehtekstoikse.
— Täl aigua meijän luajittu tiedokonehsistiemu sijoittuu minun serveral, rubien parandamah sidä da olen valmis sijoittamah sidä kaikkien käyttöh, sanoi Kalganov.
Konferensii jatkuu tänäpäi. Pivos suau kuulta suomelas-ugrilazien kanzoin kul’tuurua da elaigua tutkijoin ezityksii.
Yhty Oman Median kanualah MAX:as!
