Petroskois piettih seminuaru ”Kul’tuuru da kieli: tänäpäi, huomei da ainos”
Petroskois piettih seminuaru ”Kul’tuuru da kieli: tänäpäi, huomei da ainos”, kudai oli omistettu “Vepsänkul’tursebran” 35-vuozipäiväle. Seminuaral piettih paginua seuran monivuodehizes ruavos, šeikuittih vepsän kielen säilyttämisty da kehitändiä, sego vepsäläzien kannattamizen ruadoloi.
— Seuru allus algajen otti piäruadoloikse vepsän kirjukielen luajindan, vepsäläzien kul’tuuran da literatuuran kehittämizen, tärgevimänny keskuksennu nämmis ruadolois pidi olla škola, sanottih seminuaran luadijat pivon allus.
“Vepsänkul’tursebr” oli vepsäläzile Ven’an Federatsien kanduvähembistölöin stuatusan suajannu. Sen vepsäläzet suadih vuvvennu 2000, vuvvennu 2006 vepsäläzet roittih Ven’an Pohjaispuolen, Siberin da Loittozen Päivännouzupuolen kanduvähemböstökse.
— Tiedoruadajien hyvyös, kuduat ollah seuran aktiivistoi, vuvvennu 1989 oli luajittu vepsän kirjukieli, rubei kehittymäh vepsän literatuurukieli. Se andoi mahton luadie opastundukirjoi omal kielel, painua vepsänkielisty kirjalližuttu, lehtie da žurnualua. Vepsän kieldy sai kuulta raadivos da TV:s, sidä ruvettih opastamah školis da yliopistolois, saneli “Vepsänkul’tursebran” ruavon tuloksis Kanzallizen teatran artistu Aleksandra Aniskina.
Seminuaru piettih Periodika-julguamon seinis Ystävyskoin tilois Karjalan tazavallan piämiehen grantoin fondan avul. Pidoh tuldih tiedoalan ruadajat da kieliniekat, vepsän kielen opastajat, muzeiloin da kul’tuurukodiloin ruadajat, yhteiskunnallizih liittoloih kuulujat da virguniekat.
— Kielen kehityksen protsessat ei azetuta, liikkeheh ainos tulou nuordu, tiedäjiä da aktiivistu rahvastu, kuduat ielleh iestetäh kieldy da kul’tuurua, opastetah uuzih ruadotaboih da kielen opastamizen keinoloih, sanoi Zakonoinhyväksyndykerähmön piälikön virras olii Ol’ga Šmajenik.
Vepsän kieldy opastetah ei vaigu školis da yliopistos, ga kielikursiloil Petroskois da Karjalan Onieganrannikon piirin kylis.
“Vepsänkul’tursebr” luadiu erilazii opastundukirjoi da online-harjaituksii vepsän kielel, kudamii juatah školih da kirjastoloih.
