Petroskois pietäh soittajien kilbu
Petroskoin Karl Raution nimelline muuzikkukolledžu ilmoitti VII alovehienvälizen kanzallizien soittimien muuzikkujoukkoloin da orkestroin kilvan. Sidä pietäh 26.—27. sulakuudu 2025 paikanpiäl da loittuopäi. Kilbah vuotetah lapsien muuzikkuškolien, muuzikkustuudieloin, lapsien taidokeskuksen, keski- da yliopistoloin, taijon da kul’tuuran alan muuzikkujoukkoloi.
— Piimmo tämänmostu kilbua vuvvennu 2022. Kilbuniekat ozutettih omua neruo eri nominatsielois: lapsien da ruavahien orkestrat, pienien muodoloin ansamblit — duettu, trio, kvartettu, viijen-kahtentostu hengen muuzikkujoukot. Vuvvennu 2022 kilbah yhtyi Karjalan da Komin tazavallan kollektiivua. Ezittymäs oli 145 hengie Petroskoin, Kemin, Sordavalan, Kondupohjan, Belomorskan linnois, Uhuol da Jessoilaspäi, sanoi Oma Mediale Ol'ga Vlasova, muuzikkukolledžan piälikön sijahine.
Kanzallizien soittimien muuzikkujoukkoloin da orkestroin kilvan tarkoitus on säilyttiä da kehittiä kanzallizil soittimil soittajien neruo, korrendua nuorien da lapsien soitandumaltoloi, löydiä uuttu nerokastu soittajua. Kilbupakičuksii otetah vastah sulakuun 1. päiväh suate.
