Petroskois ozutetah perindöllizii ruuttii
Petroskoin linnan Käzineronkois 4. sulakuudu avavuu Natalja Denisovan da hänen ruadodovarišoin ozuttelu. Sit suau nähtä perindöllizii da histouriellizii ruuttii.
Aigu kerätä -nimellizes ozuttelus enimät ozutettavat ruutat roitah Natalja Denisovan ommeltut. Yhtelläh rodieugi hänen tuttavien neroniekoin da opastujien ombeluksii da čomenduksii.
— Enne jo olin yhtes toizien kel suuris ozuttelulois. Tämänmoine kogemus rodieu enzimästy kerdua. Kučuin sih ozutteluh vie Matura- da Sköl’-joukkoloin naizii da neidizii, kudamile pien erilazii kursiloi. Ozuttelus roitah heijän luajitut piähpandavat, čomendukset da kullitetul langal luajitut kirjoindehet, sanoi Oma Mediale Natalja Denisova.
Ku Natalja jo mondu vuottu kuuluu histouriellizen rekonstruksien Sköl’-kluubah, hänel on keskiaijan mallin mugah iččeh ommeltuloi karjalazen naizen ruuttii.
— Net panemmo kačottavakse. Roitah sie raudahizet da vaskičomendukset, kuduat luajittih minun tuttavat sepät. Iče minä en malta taguo, ližiäy Natalja Denisova.
Ozutteluh niškoi Natalja kaivau lippahis da škuapois kai, midä hänel on ommeltuu. Denisovan sanoin mugah ozuttelun nimekse pandu ”Aigu kerätä” tarkoittau sidä, ku kerätäh kai, midä on ozutettavua, da yhteh kučutah kaikkii, kel on taguzis kaunistu. Ozutettavien karjalazien ruutien ližäkse rodieugi kaksi Natalja Denisovan ommeltuu inkeroizien kost’umua — Kelton da Tuutarin kolkis.
Ozuttelun avajazet pietäh 4. kevätkuudu 16.00 čuasun aigah Käzineronkois (Kirovan piha, 13). Sidä suau kaččuo sulakuun 24. päiväh suate.
Aihies voit lugie vepsäksegi.
Yhty Oman Median kanualah Telegramas!
