Petroskois on istutettu vezua kanzalliskielizien joukkoviestimien kunnivokse
Tänä vuon merkivuozii täyttäjien kanzalliskielizien joukkoviestimien kunnivokse sen toimittajat istutettih Mašinanrakenduspuistikos pihl’ajan da koivun vezua.
— Istutimmo pihlahazii da koivahazii meijän joukkoviestimien kunnivokse. Sanozin, ku sil pivol on erinomaine merkičys: anna meijän istutetut puut luajitah linnua vihandakse da kaunehekse, a meijän toimitukseh anna tulis uuttu nuordu ruadovägie, sanoi Oma Mediale Natalja Sinitskaja, Oma Mua-lehten piätoimittai.
Karjalankieline Oma Mua -lehti tänä vuon tazavallan päivänny täyttäy 35 vuottu. Nimipäivyniekannu ongi Karjalan tazavallan vahnin lehti — Karjalan Sanomat — täyttäy 105 vuottu. Kaikis nuorin Periodika-julguamon joukkoviestin Oma Mediä täyttäy vaste viizi vuottu.
Istutettavat vezat on Petroskoin haldivon ilmai annetut. Enne sidä Periodika-julguamon toimittajat jo yhtyttih puuloin istutusaktsieloih.
— Myö istutimmo pedäjiä Zakonoivhyväksyndykerähmön vastaspäi olijah Sen’kinan puustoh da Periodika-julguamon oččučurua vaste pihl’uadu, sanou Sinitskaja.
Pivot kanzalliskielizien julgavoloin merkipäivien kunnivokse jatkutah. Oma Mua -lehten vuozipäivypruazniekku pietäh 6. kezäkuudu karjalazes Veškelyksen kyläs. Karjalan Sanomien pruazniekkupivot suajah jatkuo sygyzyl.
