Petroskois ilmoitetah parahat nuoret IT-alan tiedäjät
Kymmenet nuoret IT-alan tiedäjät kilbailtah linnan IT-hakatonas. KosmoKvest-hakaton pietäh 6. kylmykuudu Ennittäjän ammattiopastuksen keskuksen tilois. Yhtyö hakatonah voijah ihan ilmai 10—12-vuodehizet lapset. Voittajii miärätäh arvostetut IT-kižaindustrijan ”tiähtet”.
Petroskoilazet tytöt da brihačut ruvetah luadimah omii projektoi federuallizel IT-platformal ”Algoritmika”.
Digitualutehnolougiet ollah nygöi Ven’an tärgevimii aloi. IT-alale nuorii kuhkutetah vie školas opastujes. Petroskoisgi IT-hakaton pietäh juuri sikse: tiä nuoret ozutetah omii IT-neroloi interaktiivizii kižoi luadijes. Kogo päivän hakotonah yhtynyöt ruvetah valmistamah interaktiivizii projektoi. Kai net luajitah Scratch-programmukielel. Se on juuri lapsih da nuorih nähte adaptiiruittu programmuymbäristö, kuduan avul nuoret teriämbäh opastutah IT-neroloih.
— Projektan eräs tärgevimii tavoittehii on tuttavuttua školaniekkoi IT-alan mahtoloih. Hakatonat pyhkitäh rajan kižan sovelduksen da sen luadimizen välis. Tiä školaniekku ellendäy, ku omua programmua luadijes ei pie super-kygylöi, pidäy vai tieduo da maltuo, kuduat voibi suaha jogahine, sanou Ennittäjän ammattiopastuksen keskuksen piälikkö Ol’ga Lurje keskuksen tiedottehes.
Hakatonan luadijat tahtottas tuliel aigua pidiä hakatonat toizihgi igä-joukkoloih nähte, ku jogahine, ket tahtou, vois tarkastua omii IT-maltoloi.
Petroskois hakatonua pietäh kanzoinvälizen Algoritmika-programmiiruičenduškolan kannatuksel. Petroskois škola ruadau vuvves 2018 algajen. Täh aigah sie on opastunuh enämbi 3 000 hengie.
Aihies voit lugie suomeksegi.
Yhty Oman Median kanualah Telegramas!
