Petroskoin universitetas zavodidas opeta araban kel’
Petroskoin Valdkundaližen universitetan üläopenikad zavodiškandeba opeta araban kel’t, miš tedotadas “SAMPO TV 360” -portalal. Ezmäižed openduzčasud vedetas jo tulijal vodel. Siš tedotadihe 13. kül’mkud konferencijal, mitte oli omištadud Verhiden keliden institutan 60-voččele jubilejale.
Täl vodel institutas oli tehtud uz’ programm, mitte vaumištab verazkeližen mediasferan da kul’turidenkeskeižiden kosketusiden specialistoid. Tulijal openduzvodel üläopenikad zavodiškandeba opeta araban kel’t. Om jo löutud opendai: nece om sirialaine Jusif Zuhr. Hän om elänu Karjalas 12 vot da om radanu täga kändajan.
— Meletan, miše pigai enamba norid ristituid tahtoiškandeba opeta araban kel’t. Nügüd’ sur’ homaičuz kingitadas Päivnouzmaha: nece om uzid voimusid, hüvid nägemusid, sanui Jusif Zuhr.
Vodel 1965 Karjalan pedagogižen institutan verhiden keliden fakul’tet oli nor’, se takaib surihe sabustusihe. Fakul’tetan sündund rindatadihe Jurii Gagarinan lendandaha avarudehe. Siloi tulijoile opendajile avaižihe te verhiden keliden miruhu. Fakul’tetan ezmäižen dekanan oli Meimi Oskarovna Sevander, kudamban jured oliba amerikalaiž-suomalaižed. Vodel 2012 nece fakul’tet tehtihe Petroskoin universitetan institutaks.
Uzišt neciš temas voib lugeda mugažo suomeks.
Tarkištele "Oma Median" Telegram-kanalad!
