Petroskoin universitetan magistraturaha päzui enamba 200 mest
Petroskoin valdkundaline universitet ičeze Internet-lentpolel om painnu magistraturaha päzunuziden üläopenikoiden lugetišen. Nügüd’ siš om 206 mest, kudambiden keskes om viž verazmašt üläopenikad. Täl vodel abiturientad voiba valita ühten 28 magistrprogrammoišpäi ühesas universitetan institutas.
Vodel 2024 kaikid popul’arižembad poled abiturientoiden keskes oma kazvatuztedo, praktikaline matematik i informatik, tehnologižed mašinad i kaludišt, turizm, ekologii da filologii.
— Valičin filologižen polen, sikš miše se om minei mel’he, i lujas tahtoin jatkta rata ičein teman mödhe. Nügüd’ radan školas №25, miččes opendase lapsid röunatadud tervhuz’voimusidenke. Meletan, miše nece om tärged da tarbhaine azj. Sikš minun pästandtön tem oli “Suomen kelen openduzmaht rados lapsidenke, kudambil om röunatadud tervhuz’voimusid”. Nügüd’ se om lujas aktualine problem, i tahtoin oppida sidä süvemba, starinoiči “Oma Media” -portalale magistraturan üläopenik i školan №25 opendai Irina Ponomar’ova.
Täl vodel äjad magistrprogrammad taričeba vaiše maksuližid openduzsijoid.
Männudel vodel Petroskoin valdkundaližen universitetan magistraturaha päzui enamba 300 mest.
Uzišt neciš temas voib lugeda mugažo suomeks.
