Petroskoin paikannimien luvettelu on tävvendetty
Petroskoil on hyväksytty linnan uvvistettu da tävvendetty paikannimien luvettelu. Miärävyksen sih nähte allekirjutti Petroskoin linnan piälikkö Inna Kolihmatova. Endizes, vuvvennu 2021 luajitus luvettelus oli läs 3700 paikannimie, tämän vuvven luvettelus — enämbi 6700 nimie. Net ollah eländypiirilöin, uuličoin, ajotieloin, kujoloin, lagevoloin, randupihoin, puustoloin da puustikkoloin, järvilöin, lambiloin, jogiloin, suarien da lahtien nimet. Luvettelus tarkah on kirjutettu kus tämä libo tai kohtu on olemas.
Karjalakse paikannimilöi kiännetäh Sanastokomiissieh kuulujat rahvas. Puolet Petroskoin paikannimilöis on jo kiännetty.
— Tämä on ylen suuri, tärgei da jygei ruado. Se ei ole vai yhten paikan nimen kiändämine. Ku kiändiä oigieh da tolkun luaduh, pidäy syvendyö sen kohtan histourien, ellendiä mindäh se on suannuh moizen nimen. Sanastokomiisien livvinkarjalazien alaozastos sidä jygiedu ruaduo ruadau Ol’ga Ogneva. Abuu da kannatustu häi suau Tatjana Boikos, sanoi Oma Mediale sanastokomiissieh kuului Natalja Sinitskaja.
Vuvvennu 2021 Petroskoin linnas ruvettih azettamah kaksikielizii nimilaudazii. Net ollah yhty luaduu da mustoitetah endizii, kudamii sai nähtä Petroskoin pihoil 1950-luvul.
Uvvistettu da tävvendetty Petroskoin paikannimien luvettelu löydyy Petroskoin haldivon internet-sivul.
Aihies voit lugie ven'aksegi.
