Petroskoil kuuluu kanzallizien soittimin helineh
Karjalan piälinnas 1.—3. kevätkuudu pietäh kogo Ven’an rahvahallizien muuzikkusoittimien festivuali. Kogo Ven’an pivon toizes alovehellizes vuoros suau nähtä Ven’al eläjien kanzoin muuzikkusoittimii.
Festivualih yhtyy Ven’an 13 agjas — Sankt-Peterburgan, Belgorodan, Voulogdan, Vouronežan, Kaliningruadan, Arhangel’skan linnois, Ivanovan, Kalugan, Kostroman, Piiterin, Lipetskan, Pskovan alovehil da Karjalaspäi tulluzii taidojoukkoloi, ilmoittau Karjalan rahvahallizien taijon da kul’tuurualguhpanoloin keskus omassah VK-sivul.
Petroskoi rodieu festivualin pohjavimakse piendykohtakse. Tänä vuon sen pidoloi jo piettih Irkutskas. Karjalan jälles festivuali eistyy ielleh Stavropolin alovehele da Udmurtieh.
Festivualin pivot hommatah Karjalan Kanzallizen teatran tilois. Pivon programmu on suuri. Kevätkuun 1. päivänny 17.00 čuasun aigah teatras avavuu kanzallizien soittimien ozuttelu. Sih tulluot nähtäh soittimii, tiijustetah niilöin azujis da ruadopajois, kudamis niidy luajitah, kuultah soittimien iändy. Petroskoilazet da linnah tulluot kuultah mittuine iäni on mongoloin altai jatga -soittimel, Vladimiran alovehen sarvuol, udmurtoin kuzibal, komilazien sigudekal da tiettäväine karjalazien kandelehel da jouhikol. Samannu piän 18.00 čuasun aigah algavuu konsertu ”Kalevala: Kuvastus”.
Festivualin tossu piän pietäh ruadopajoi, press-konferensii da palkitah festivualih yhtynyzii. Sen jälles rodieu festivualilazien suuri gala-konsertu.
Projektua todevutetah Prezidentan kul’tuurualguhpanoloin fondan kannatuksel.
Aihies voit lugie suomeksegi.
Yhty Oman Median kanualah Telegramas!
