Petroskoih nostetah Bioteh-tehnopuusto
Vuvvennu 2027 Karjalan piälinnah Oniegan järvirandah avatah Bioteh-tehnopuusto, kuduan tilois jo nygöi tahtottas ruadua 12 rezidentua.
— Nygöi rakendusruadolois on 40 hengie da tehnikkiä 14 palua. Tehnopuuston pinduala rodieu 9 tuhattu nelliömetrii. Rakendusruavot ennitetäh grafikkua, vuvven 2027 loppuh suate puusto rubieu ruadamah, kerdou tulien tevolližusalovehen piälikön Aleksandr Pol’akovan sanoi Respublika-uudizientoimisto.
Uuttu objektua nostetah jo ruavos olijan Karel’skije produkti -tehnopuuston lähäle. Rakendusruadoloi käi valvomah Karjalan piämies Artur Parfenčikov.
— Nygöi enzimäine ruado on valmistua objektu, sen jälles rubiemmo ”elavuttamah” sidä. Meil on vagavii pluanoi ruadua yhtes Kurčatovan yliopiston kel biotehnolougieloin alal. Ajattelemmo sijoittua tänne tiedotevolližusklasteru, rubiemmo pagizemah sih nähte yliopiston edustajien kel, kuduat terväh tullah Karjalah käymäh, sanoi tazavallan piämies.
Uvven tehtopuuston rakendamizeh Karjalan tazavaldu kyzyi 350 miljounua rubl’ua federuallizes b’udžietaspäi. Tämä tehnopuusto rodieu jo nelläs Karjalas.
Karjalas tehnopuustoloin rezidentoih nähte ollah erinomazet ekonoumiellizet helpotukset da kannatuskeinot: subsiidii 10 miljounua rubl’ua suate laittehiston ostamizeh, alendetut veromiärät da kannattamine kanzallizen Effektiivine da kilbukygyine ekonoumiekku -projektan hantuzis.
Aihies voit lugie suomeksegi.
Yhty Oman Median kanualah MAX:as!
