Petroskoiš valitas parahimad valdkundan kodikelen opendajad
28.—29. sulakud Petroskoiš mäneb “Karjalan Voden opendai - 2026”-konkurs. Erine nominacii om jagetud kodikelen opendajile. Vägestuses neciš nominacijas voibištelese nel’l’ mest.
Tämbei Petroskoin Suomalaiž-ugrilaižes školas mäniba kodikelen opendajiden ozuteluzurokad. Konkursan ühtnikoin oma karjalan kelen opendai Kostomukšaspäi Marina Perttunen, suomen kelen opendajad Inna Lantratova Petroskoišpäi i Arina Jefimova Präžaspäi da vepsän kelen opendai Gleb Fomin Šokšuspäi.
— Tämbei minun urokal oliba eri-igäižed lapsed. Valičin heiden täht “Irdnägo” -teman, mittušt opetas ezmäi nelländes klassas, a sid’ süvemba senke tundištadas jo vanhembiš klassoiš. Urok mäni hüvin. Mö lapsidenke äjan vändim. Meletan, miše vändon kävutoitand openduses om lujas tarbhašt, sanui Gleb.
Gleb Fomin radab Šokšun školas kuz’ vot, toižen kerdan hän ühtneb “Karjalan Voden opendai - 2026”-konkursaha.
Edel opendajil om völ kaks’ konkursan tegendad: tämbei — “Pagin kazvatajidenke” da homen — “Pagištoituz opendajidenke”. Parahimad Karjalan opendajad ühtneba “Voden opendai”-konkursan ühthižvenälaižehe etapha.
Kaiked konkursan regionaližehe etapha ühtneb 29 opendajad Karjalan 15 rajonaspäi. Täl vodel “Karjalan Voden opendai - 2026”-konkurs mäneb jo 30. kerdan.
Tarkištele "Oma Median" MAX-kanalad!
