Petroskoiš praznuitihe Karjalan rahvahan sädon päiväd
Karjalan valdkundan päivän “Lisji ogni” -nügüdläižen taidehen muzejas tehtihe azjtego, mitte oli omištadud Karjalan igähižiden rahvahiden sädoile. Praznikal oli ezitadud erazvuiččiden voz’sadoiden karjalaižiden, vepsläižiden, inkerilaižiden da venälaižiden tradicioтaližid sädoid.
— Nece idei sündui völ siloi, konz kerdan erasid vozid tagaze, “Periodika” -painišton radnik, rahvahan sädon mastar’ Margarita Kemppainen tariči ühtesradnikoile panda päle rahvahiden sädoid Karjalan valdkundan päiväks. Tämbeižen praznikan ühtnikad oma sen tegijad-ki. Nene oma kaik, ken ombli ičeleze sädon da ozuti sen tägä, sanui praznikan vedäi, üks’ sen pätegijoišpäi Natalja Denisova.
Azjtegod tugeziba X Karjalaižiden suiman valdakahiden nevondišt, “Kajahuš” -fol’klorišt-etnografine ansambl’ (miččen ühtnikad oma “Matura” -tradicionaližen sädon sebran ühtnikad), “Kiži” muzejan tradicionaližiden radonmahtoiden kaičendan da oppindan sektor, “Vepsän kul’tursebr”, “Tradicijad nügüdläižel aigal” -fond, “Rihma”-sebr.
Sädoiden ozutandan jäl’ghe kaik praznikale tulnuzid ristituid ühtenzoiti kruuga-karg.
Ližaks 30. sulakud – 8. kezakud mäni onlain-akcii #расфуфыриласьКарелия -hešteganke. Akcijan ühtnikad paniba ičeze VKontakte -lehtpolile kirjutesid fotoidenke Karjalan rahvahiden sädoiš. Mugoine praznik, tegijoiden mel’pidon mödhe, abutab kaita da popul’arizoitta rahvahan sädon tradicijad.
Tarkištele "Oma Median" MAX-kanalad!
