Petroskoiš pidetas “Bubrihan lugendad” -konferencii

Tedokonferencijaha ühtneba tetabad tedomehed, nored specialistad, aspirantad da üläopenikad Karjalaspäi da toižiš Venäman regionoišpäi. Kuva: Darja Hil’

Petroskoiš 17.—18. sügüz’kud mäneb “Bubrihan lugendad: Venäman Öbokan tedoalovehidenkeskeižed gumanitarižed oppindad” -XXI Ühthižvenälaine tedokonferencii. Azjtego pidetas “Tedo röunita: tedoalovehidenkeskeine ühthižtö” -rahvahidenkeskeižen akademižen foruman aigan. Täl vodel forum om omištadud Venäman tedoakademijan Karjalan tedokeskusen 80-voččele jubilejale. Siš tedotadas konferencijan oficialižel internet-lehtpolel.

— Tedokonferencijan aigan eriline homaičuz planuitas kingitada Venäman Öbokan rahvahiden kul’turiden da keliden oppimižehe: sen uzihe formihe, metodoihe da satusihe, a mugažo tedoalovehidenkeskeižihe kosketusihe i kul’turiden dialogaha, tedotadas azjtegon lehtpolel.

Tedokonferencii pidetas Venäman tedoakademijan Karjalan tedokeskuses (Petroskoi, Puškinskaja-ird, 11). Sihe ühtneba tedomehed da üläopenikad Petroskoišpäi, Piterišpäi, Moskvaspäi, Murmanskaspäi, Vologdaspäi, Smolenskaspäi, Siktivkaraspäi da toižiš Venäman lidnoišpäi.

Venäman Öbokan rahvahiden kul’turiden da keliden navedijad mugažo voiba tulda konferencijale kundlemaha dokladoid.

Parahimad dokladoiden materialad paindas vodel 2027 “Studia Nordica” - da “Petroskoin universitetan tedokirjutesed” -žurnaloiš.

“Bubrihan lugendad: Venäman Öbokan tedoalovehidenkeskeižed gumanitarižed oppindad” -konferencijan tegijad oma Karjalan tedokeskusen Kelen, literaturan da istorijan institut, Petroskoin universitetan Filologijan institut.

Tarkištele "Oma Median" MAX-kanalad!