Petroskoiš mäni Sur’ etnografine saneluz
7. kül’mkud Karjala udes ühtni “Sur’ etnografine saneluz” -tedotelendakcijaha. Se oli sätud Karjalan Valdkundan Rahvahiden sebruden kodiš. Akcijan pätegii oli Rahvahuziden azjoiden federaline agentstv, miččele Karjalas abuti rahvahaližen da regionaližen politikan ministerstv.
Täl vodel Rahvahiden sebruden kodiš sanelusen kirjuti 110 mest, kudambišpäi enambišton oli norid ristituid. Ühtnikoiden keskes mugažo oli 149. segoitadud lendanddivizijan 11 soldatad Venäman erazvuiččiš regionoišpäi. Sanelusen kirjutiba školiden da universitetan openikad, rahvahaližiden sebroiden pämehed, Zakonoiden tegendan Kundan deputatad, eländtahoiden pämehed.
— Tahtoin ičein ühtneda Surehe etnografižehe sanelusehe. Se om čoma voimuz levitoitta ičeze tedoümbrust, tundištadas Venäman rahvahiden kul’turjäl’gestusenke, tedištada midä-se ut da melentartušt meiden sures kodimas da sen istorijas, sanui Anna Valerjevna Lopatkina, Karjalan Valdkundan Zakonoiden tegendan Kundan deputat.
Ühtnikoile oli taritud 45 minutas antta vastused 30 ühthižfederaližehe küzundaha. Täl vodel, Kodiman kaičijan vodel, ezmäižen kerdan sanelusen küzundad lugi än’heze ičeze eriližen voinoperacijan veteran Dmitrii Jurjevič Konstantinov.
Oiktad vastused anttas sanelusen lehtpolel. 12. kül’mkun päiväspäi. Sada sertifikakad ühtnikad voiba Rahvahiden sebruden kodiš 12. kül’mkud jäl’ges.
Ezmäižen kerdan “Sur’ etnografine saneluz” -tedotelendakcii mäni vodel 2016. Siloi sanelusehe kaiked ühtni läz 90 tuhad mest.
Tarkištele "Oma Median" Telegram-kanalad!
