Petroskoiš mäni seminar ”Kul’tur da kel’: tämbei, homen, kaiken”, mitte oli omištadud “Vepsän kul’tursebran” 35-voččele jubilejale. Seminaral tehtihe sebran äivoččen radon ühthevedoid, pagištihe vepsän kelen kaičendan da kehitoitandan küzundoiš, a mugažo vepsän rahvahan tugen küzundoiš.
— Sebran pätegendad oma vepsän kirjkelen da kirutuzkelen tegemine, vepsän kul’turan da literaturan kaičend, kehitoitand i popul’arizoitand, päazjan necidä radod tehtas vepsän man školiden abul, sanuiba seminaran tegijad.
“Vepsän kul’tursebran” taguiči vepsläižed putuiba Venäman igähižiden vähäluguižiden rahvahiden lugetišehe. Mugoižen oficialižen statusan vepsän rahvaz sai vodel 2000, a vodel 2006 tegihe Venäman Pohjoižen, Sibirin da Edahaižen Päivnouzman-ki igähižeks vähäluguižeks rahvahaks.
— Vodel 1989 tedomehed, kudambad oma sebran aktivižed ühtnikad, tegiba vepsän kirjutuzkelen, siš aigaspäi kehitoitase vepsän kirjkel’. Nece azj abuti openduzkirjoiden, vajehnikoiden, čomaliteraturan da lehtesen tegemižes. Vepsän kel’ kuluškanzi radios da telenägudeses, sidä zavottihe opeta školas da universitetas, jagoihe “Vepsän kul’tursebran” satusil Karjalan Rahvahaližen teatran aktris Aleksandra Aniskina.
Seminarale tuliba tedomehid, vepsän kelen opendajid, muzejiden da kul’turpertiden radnikoid, valdmehid, sebran ühtnikoid.
— Vepsän kelen kehitoitandan process ei seižutanus: tuleskeleba aktivižed, nored specialistad uzidenke idejoidenke, hö jatktaba radod vepsän kelen da kul’turan kehitoitandan poles, toba eloho uzid kelen opendusen mahtoid, sanui Karjalan Zakonoiden tegendan kundan varapämez’ Ol’ga Šmajenik.
Vepsän kel’t opetas školiš da universitetas, mugažo kursil Petroskoiš da Karjalan Änižröunan vepsläižiden eländtahoiš. “Vepsän kul’tursebr” tegeb erazvuiččid abukirjoid da online-harjoitelusid vepsän kelen opendamižen täht, sid’ ned anttas školihe da kirjištoihe.
Uzištoid neciš temas voib lugeda mugažo karjalan, suomen da venän kelil.