Petroskoi: linnas pietäh Biblioyö 2025
Ven’al nellättytostu kerdua pietäh ”Biblioyö”. Tämän vuvven aihiekse on otettu ”Omat urhomiehet” da se on omistettu Ižänmuallizes voinas voiton 80-vuozipäiväle. Petroskoin kirjastoloin keskussistiemu kuččuu eri-igähizii linnalazii 25. sulakuudu 2025 pidoloih, kudamii pietäh kolmes kohtas.
— Gusarovan nimizes kirjastos 18.00-21.00 aigah pidoh tulluot kuultah voinupajoloi, tiijustetah uuttu karjalan partizuanois da suajah iče kerduo omis urholois. Linnan eläjät da Petroskoin gost’at vastavutah karjalazien kirjuttajien kel, tiijustetah eččijöin ruavos, kačotah fil’moi da kižatah stolakižua ”Tie Voitoh suate”. Pidoh tulluzile varustetah kirjuozuttelu, kudai rodieu omistettu voiton 80-vuozipäiväle, on kerrottu Petroskoin kirjastoloin keskussistieman saital.
Danilovan nimine lapsien kirjasto kuččuu programmah ”Alisan kel Kumman muah libo Krooliekan kuoppua myöte alah”. Tänä vuon täydyy 160 vuottu Lewis Carrollan Alisa Kumman muas -kirjan ilmoih piäständäs. Kirjan ven’akse kiändäjien joukos oligi Boris Zahoder. Häi omas tahtos lähti voinale da vuvven 1944 keviässäh puolisti omua muadu Karjalan frontal. Vie eräs kirjan kiändäi on Aleksandr Olenič-Gnenenko. Oli vojuimas päivänlaskupuolizel liiniel Voittoh päi -lehten toimittajannu. Lapsien kirjaston ruadajat kehoitetah yhtes kirjan urholoin kel lähtemäh kummanluaduzeh matkah, linnalazii vuotetah master-pajat da kižat.
Toizen muailman voinan eräs tärgevimis dokumentois on Anna Frank nimizen tyttözen päivykirju. Se on kiännetty enämbi mi gu 70 kielele da on muailman eräs lugiettavimis kirjois. Vangileirih kuolluon tytön päivykirju sanelou natsistoin julmis tegolois. Kirjasto n:u 22 kuččuu Biblioyön aigah kaččomah Ari Fol’manan da Devid Polonskin graafizen romuanan komiksoi, kuduat on luajittu Anna Frankan päivykirjan pohjale.
Aihies voit lugie vepsäkse da suomekse.
