Petroskoi: Kukonmäjen poliklinikan uutta filialie valmissettah avajaiseh

Nykyaikaseh rakennukšeh ašetetah eri ošaštoja ta huonehie. Kuva: Karjalan tašavallan piämiehen lehistöpalvelu

Kukonmäjen poliklinikan nykyaikani filiali on rakennettu Pitkä ta aktiivini elämä -kanšallisprojektin rajoissa. Kaikki rakennuštyöt on lopetettu. Poliklinikkah on jo ašetettu mammograffi, rentgenilaitteh, endoskoppija, ultraiänilaittehie ta muita, kertou Karjalan tašavallan piämiehen lehistöpalvelu.

— Diagnostiikka šemmosilla laittehilla antau löytyä tautija alkuvaiheissa, mi on tosi tärkietä eläjillä. Šamah aikah ruamma lisenssijoinnan alalla — nyt vuatimukšet liäketiijolliseh apuh ollah melko ankarat. Meijän pitäy šuaha yli 60 lisenssie. Olemma alkan ruatuo, šelitti Artur Parfenčikov omalla lehistöpalvelulla.

Neuvotteluh ošallissuttih poliklinikan piäliäkäri Ol’ga Bilko ta Petroskoin neuvošton deputatti Andrei Ušakov.

— Vielä kakši ta puoli vuotta takaperin šiinä oli autivo, a nyt on uuši poliklinikka. Še on luajittu yheššä eläjien, halličukšen, kaupunkin hallinnon ta deputattien kera, korošti Ol’ga Bilko.

— Poliklinikka on mainijo. Oša laittehista on jo oššettu. Valmissamma spesialistija — nyt yli 60 henkie opaštuu tarkotušmiäräykšien mukah.

Nelläkertani nykyaikani rakennuš on rakennettu Pitkä ta aktiivini elämä -kanšallisprojektin rajoissa. Šiih ašetetah terapeftiošašto, dignostiikkapalvelu, hoito- ta rokotušhuonehie, liäketiijollisen šuojelun ošašto, spesialistien ta enšiavun huonehie.

Aihiešta voit lukie niise šuomekši.

Yhty Oman Median MAX-kanalah!