Petroskoi kuččuu ruokafestivalih

Festivalin aikana voipi nähä, kuin paissetah kalittoja ta šulččinoja Jemel’a-kiukuašša. 0+. Kuva: Julija Filippovan Vkontakte-šivu

Šuovattana kello 13 Leninin valtakavun ta Onegan rantakvun ristevykšellä alkau karjalaisella, vepšäläisellä, pomorilaisella ta arktisella keittijöllä omissettu ruokafestivali. Vierahat šuahah maissella kaikenmoisie šyömisie ta juomisie, ošallistuo muasteri-oppiloih, nähä ainutluatuini šiirtäjä kiukua.

— Ohjelmašša on mansikka- ta mesisoussien valmistamiskilpailu, juomisien kilpailu, ruvvanlaittamisen šou “Perehen kalakukko”, luventoja ruuvvašta. Pruasniekan joka vieraš voipi maissella karjalaisen, vepšäläisen, pomorilaisen ta arktisen keittijön ruokua, šanottih Karjalan talouškehityš- ta tevollisušministerijön lehistöpalvelušša.

Festivali alkau Onegajärven rantakavulla, missä Leninin valtakatu alkau kello 13.00 ta loppu kello 22.00. Järještäjänä on Miun biznessi-keškuš. Tapahtuman tarkotukšena on kiinittyä huomijuo tašavallan kanšojen ainutluatuseh ruokah. Še yhistäy perintehellisen ruuvvan tietäjie ta keittäjie šekä ruokatuottehien valmistajie.