Petroskoi, Kondupohju da Anuksenlinnu: perindölöi uudeh luaduh
Runohuon teatru ”Kredo” alguau 8. sulakuudu suuren pivon ”Traditsija v dviženii”, kuduan tapahtumat pietäh Petroskois, Kondupohjas da Anukses.
Traditsija v dviženii -nimelline šou pietäh 8. sulakuudu Kondupohjan kirjastos 17.30 čuasun aigah. Kondupohjalazet da tulolazet rahvas suajah nähtä Karjalan, Udmurtien, Marin tazavallan, Uzbekistanan da Kirgiizien artistoin, muzikantoin ezityksii. Petroskoin, Iževskan, Zvenigovan, Kirgiizien Oša-linnan da Uzbekistanan Namangan-linnan etnodizainerat ozutetah 15 perindöllizien da etnosobien kogomustu. Pidoh tulluot suajah kuulta Puškinan runoloih kirjutettuloi romansoi kirgiizien kielel da nähtäh, kui kaimatah andilastu kodoilaspäi kirgiizoin perindölöin mugah. Veseldyttämäh kaččojii da kuundelijoin ruvetah ”Toive”, ”Šuldir”, ”Petrovskaja sloboda”, ”Sudaruška” da toizet pajo- da soittojoukot.
— Tämä fourumu on loppuhvedäi pido, kudai rodih ”Kredon” kahten suuren projektan tuloksennu — ”Monipuoline suomelas-ugrilazien muailmu” da ”Puškinan vastavukset Keski-Aazies”. ”Kredo” sydämellizesti kiittäy Prezidentan kul’tuurualguhpanoloin fondua, Prezidentan grantufondua, Karjalan tazavallan Kanzallizen da alovehellizen poliitiekan ministerstvua, Petroskoin linnan haldivuo, Petroskoin valdivonyliopistuo avus ”ven’ankielizen sanan” eistämizes, folklouran, käzineroloin säilyttämizes da kanzoinvälizen yhtehizen ruavon kannattamizes, sanoi Oma Mediale Inga Gajevskaja, Kredo-teatran piälikkö.
Tämänmoizet pivot pietäh 9. sulakuudu Petroskoin linnan haldivos 18.00 čuasun aigah, Anuksen ližäopastuksen keskukses 10. sulakuudu 17.30 čuasun aigah da 11. sulakuudu 15.00 čuasun aigah Petroskois Ystävyskois adresil Titovan piha, 3.
