Peruškorjaukšen anšijošta Karjalan koululaiset opaššutah mukavissa oloissa

Kouluissa uuvvissettih inšeneriverkkoja, katokšie, oččašenie, pirttijä ta äšen aluštoja. Kuva: Karjalan tašavallan piämiehen lehistöpalvelu

Vuotena 2025 peruškorjattih Puudožin piirin Avdejevo-pos’olkan ta Pitkärannan piirin Läskelän pos’olkan koulut šekä Petroskoin 7. koulu, Kemin. 3. koulu ta Segežan 4. koulu. Koululaiset opaššutah uuvvissetuissa tiloissa Nuoriso ta lapšet -kanšallisprojektin anšijošta. Korjauštyöt ollah loputtamašša Karjalan yhekšäššä muušša koulušša. Šiitä tiijottau Karjalan tašavallan opaššuš- ta urheiluministerijö.

— Nyt koululaiset opaššutah nykyaikasissa luokissa ta käytetäh aktualisie laittehie. Esimerkiksi tänä vuotena Kemin 3. koulu šai laittehet Turvallisuon ta šynnynmuan puoluššannan peruštehet -opaššušainehta varoin: laseriampumaravan, opaššuškranattija ta ašeita, pommišuojan mallin ta toisie opaššuštarvikkehie, kerrotah tiijotukšešša.

Petroskoin 7. koulu rakennettih vuotena 1966, ta še ammuin vuati korjaušta. Rakennukšešša uuvvissettih oččapuoli ta katoš šekä vajehettih ikkunat, vejenhankinta- ta lämmityšsistemi, šähköverkot.

Kaikkieh tänä vuotena peruškorjaušohjelmah Nuoriso ta lapšet -kanšallisprojektin rajoissa ošallistu 14 kouluo.

Yhty Oman Median Telegram-kanalah!