“Periodika”-painišt: “Runosarnad”-kirj sai korktan pauklahjan

Konkurs vedetas kerdan kahtes vodes Hanti-Mansijsk-lidnas vodelpäi 2004. “Periodika” eziti ičeze kirjoid konkursal da kirjoiden ozutelusel ezmäižen kerdan. 6+ Kuva: Jekaterina Golubnik

Dmitrii Dmitrijevan “Runosarnad”- da “Runosarnad 2” -kirjoiden serii tegihe “Jugran kirj – 2024” -konkursan laureataks “Parahim kirj lapsile da norištole” -nominacijas. Konkurs mäni “Jugorika”-kirjozutelusen aigan, mitte oli tehtud Hanti-Mansijskas. Ozutelusel oli ezitadud 174 painust erazvuiččiš Venäman agjoišpäi. – Ozutelusehe “Periodikan” kirjad ühtniba ezmäižen kerdan.

— “Periodika” surel tahtol ühtni ozutelusehe. Nece mahtišt toi meile satusen, jagoihe ičeze tundmusil painišton pämez’ Natalja Sinickaja. 

“Jugran kirj – 2024” -konkursaha ühtni 95 painust, 37 organizacijad da 34 avtorad. – “Periodika” eziti koume ičeze kirjad. “Runosarnad” om todesine bestseller, mö pästam sen udes jo videnden kerdan. Meid ihastoitab, miše kirj om mugoine popul’arine lugijoiden keskes: sen ostleba turistad da sijaližed eläjad, sanui Natalja Sinickaja. 

— Tahtoim mugažo jagatas völ ühtel čomal uzištol! Mö oigenzim “Runosarnad 3” -kirjan tipografijaha, sanui “Oma Media” -portalale painusiden pästandan erišton pämez’ Irina Šilnikovskaja. 

Dmitrii Dmitrijevan “Runosarnad 3” -kirjan tiraž linneb 3000 ekzempl’arad.

Uzištoid neciš temas voib lugeda mugažo suomen da venän kelil.