“Periodika”-painišt putui “Voden kirj 2025” -konkursan vägestajiden lugetišhe
“Periodika”-painišt putui “Voden kirj 2025” -konkursan vägestajiden lugetišhe. Nina Zaicevan “Minun vepsläine oza” -kirj sai III sijan “Painuz, mitte tegeb panendan kul’turiden dialogaha” -nominacijas “Lugii mir” -XI Regionoidenkeskeižel festivalil. “Voden kirj 2025” -konkursan vägestajiden pauklahjoičend mäni 25. sügüz’kud R’azanin oblastin kirjištos Gor’kijan nimel.
— Meiden painišton kirjad oma tutabad R’azanin eläjile, ned kaičese R’azanin oblastin kirjištos Gor’kijan nimel. Sil vodel mö vägestim “Voden kirj” -konkursas — saim diploman Nina Grigorjevna Zaicevan “Minun vepsläine oza” -kirjas. Nece povest’ starinoičeb vepsläižen külän peitusiš, rahvahan filosofijas da problemoiš, miččed koskeba kodikelen kaičendad, sanui “Oma Media” -portalale Tatjana Tiškova, “Periodika”-painišton pästandan erišton pämez’.
“Minun vepsläine oza” om kaks’keline kirj, miččen konkursan ž’uri valiči 218 pakičusespäi 80 ühtnikalpäi. Nece povest’ tundištoitab ičeze lugijoid vepsläižiden — Karjalan Valdkundan igähižen vähäluguižen rahvahan — tradicijoidenke da kelenke.
“Lugii mir” -festival’ om sija, kus rahvahidenkeskeižed sidod vahvištuba. Sigä voib nägištada Venäman rahvahiden literaturiden erigoičusid da čomut.
Uzišt neciš temas voib lugeda mugažo venäks.
