Periodika ozuttau omat uvvet kirjat Kniigumelličäs
Tuhukuun 26. päivänny Petroskoin Periodika-julguamo ozuttau mennyt vuon jullattuloi kirjoi KniigyMelliččy-nimellizes pivos. Sit sanellah kaunokirjalližuskirjois, lapsile tarkoitettulois da nouttu- da runokogomuksis.
— KniiguMelliččy on perindölline jogavuodehine tapahtumu. Pidoh yhtyy toizien joukos vepsäläine kielentutkii Nina Zaitseva, kudai kerdou Minun vepsläine oza -kirjas. Pidoh tulou sežo Karjalan opastundankehityksen instituutan etnokul’tuurizen opastuksen keskuksen ruadai Ol’ga Hramtsova. Häi kerdou Karjalan kanzoin suarnat -kogomuksen kolmandes ozas, kerdoi Oma Mediale Periodika-julguamon spetsialistu Jekaterina Jeremejeva.
Pivos Karjalan kanzoin ystävystaloin ruadajat kerrotah stolakižois, kuduat luajitah nägevembäkse Kalevala-runoelmua da tazavallas eläjien kanzoin eländytaboi.
— Kerromme stolakižois, kuduat tuttavutetah rahvastu Karjalan kanzoin erilazih perindölöih da kul’tuuroih. Stolakižat on tarkoitettu kui lapsile mugai aiguhizile, sanoi Oma Mediale Karjalan kanzoin ystävystaloin piälikön virras olii Aleksandra Kuznetsova.
Juuri nygöi Karjalas jatkuu Vuvven kirju 2025 -kilbu. Tänä vuon Periodika-julguamon kirjat kilbaillah kuvves nominatsies: Kirjan taido, Hyvä kirju, Tiijon valgei, Karelia=Karjala, Kodirandu sen eläjät da Lugietah da lugietah uvvessah.
Zajavkoi otetah vastah kevätkuun 5. päiväh suate. Kilvan voittajat ilmoitetah da palkitah kanzoinvälizenny kirjupäivänny 23. sulakuudu Karjalan kanzallizes kirjastos Petroskois.
KniiguMelliččy pietäh Karjalan kanzoin ystävystalois Petroskois adresil Titovan uuličču, 3. Pido algavuu 16.00 čuasun aigah.
Aihies voibi lugie myös suomekse da ven’akse.
Yhty Oman Median kanualah Telegramas!
