Periodika-kuštantamo: kanšalliskielisien paperilehtien julkaisomini jatkuu
Karjalan tašavallan autonomisen laitokšen Periodika-kuštantamon johtokunta imottau, jotta kanšalliskielisien joukkoviestimien – Oma Mua-, Kodima- ta Karjalan Sanomat -lehtien šekä Kipinä-kuvalehen julkaisomini jatkuu.
– Olemma ilosie, jotta varojen antamiseh liittyvä kyšymyš ratkaistih jouštavašti. Kiitämmä kaikkie asien ratkaisomiseh ošallistunuita viraštoja. Kanšalliskieliset mediatoimitukšet ruatah virkaluvettelon mukah. Karjalan-, vepšän- ta šuomenkielisien paperilehtien julkaisomini jatkuu. Passipo lukijilla, Karjalan yhteiskunnalla ta kollegoilla kannatukšešta, kommentoi Periodika-kuštantamon piäjohtaja Natalja Sinitskaja.
23. šajekuuta tuli tieto, jotta Periodika-kuštantamo keškuštau omien kanšalliskielisien lehtien ta kuvalehtien julkaisomista šajekuun 24. päiväštä alkuan rahotukšen puuttehen takie.
Šiitä on virallisešti annettu tietyä kanšalliskielisien joukkoviestimien peruštajilla: Karjalan tašavallan halličukšella, Karjalan tašavallan Lakienluajintakokoukšella, Opaššuš- ta urheiluministerijöllä, Kanšallisen ta alovehellisen politiikan ministerijöllä, Karjalan Rahvahan Liitolla šekä Karjalan tašavallan Roskomnadzor-viraššin hallinnolla.
