“Periodika” esitti omua toimintua Vienan Karjalašša

Periodika-kuštantamo tuttavuššutti Kotamukšen ta Vuokkiniemen eläjie omah toimintah. Kuva: Uljana Tikkanen

Viime netälinloppuna Oma Mua -lehen, Kipinä-kuvalehen, Oma Media -mediaportalin šekä Karjalaisien, šuomelasien ta vepšäläisien kieliresurssikeškukšen ruatajat oltih työmatalla Koštamukšen kaupunkipiirissä.

Vierailun tavoittehena oli kertuo kuštantamon ruavošta šekä šuaha uušie lukijie ta kirjuttajie.

– Šemmosie matkoja on järješšettävä, jotta Karjalan piirilöissä muissettais, jotta on olomašša Karjalan kanšalliskielisie viessintöjä, jotta ihmiset luvettais niitä. Myö tuttavuštima ihmisie niise Periodika-kuštantamon kirjauutukših ta rahvaš voitih niitä oštua, lisäsi Oma Mua -lehen piätoimittaja Ol’ga Smotrova.

Ohjelmašša oli kakši muasteri-oppie aikuhisilla ta ykši lapšilla. Kipinä-kuvalehen taiteilija Ol’ga Demidova näytti lapšilla, mitein luatie Kevätkuun kiššoja paperista. Monet muasteri-oppih ošallistunuot lapšet jo luvetah “Kipinyä” ta eryähät niise opaššutah karjalan kieltä.

Paikallisien karjalaisien šuurta kinnoššušta šynnytti Karjalaisien, vepšäläisien ta šuomelaisien kieliresurssikeškukšen spesialistin Natalja Denisovan kertomuš karjalan puvušta. Muasteri-opissa Natalja näytti puvun erikoisukšie ta kerto šen istorijašta.

Marija Spitsinan muasteri-oppi oli omissettu kiäntämisellä ta še oli mukava karjalan kielen opaštujilla ta tietäjillä.

Toimittajat toivotah, jotta matan jälkeh kuštantamon julkaisuilla lisäytyy lukijie.