Perindöllizien syömizien retseptoi kerätäh Karjalan pohjazes
Karel´skaja kuhn´a i točka -projektan rahvas lähtietäh Karjalan pohjazih kylih. Pakkaskuun 29. päivän da tuhukuun 1. päivän välis projektujoukko kävyy Jyškyjärveh da Vuokkiniemeh keriämäs ainavoluaduzii retseptoi da paikallizien eläjien kerdomuksii.
— Tämä on enzimäine projektan yheksäs ruadomatkas. Allammo pohjazespäi. Tahtommo vastavuo paikallizien eläjien kel, kuduat vie mustetah ennevahnazii retseptoi, toinah voijahgi ozuttua kui vahnan luaduh valmistettih syödäviä. Kai net rubiemmo kuavuamah, meijän kel yhtes lähtöy fotokuvuaju Ilja Timin. Luajimmo videotgi, kuduat jälles sijoitammo internettah. Joga kyläs tahtozimmo kirjuttua kolme-viizi retseptua, sanoi Oma Mediale projektan piälikkö Anna Anhimova.
Projektan hantuzis huavatah luadie kirju ”Kuhn´a narodov Karelii”, kuduah ruvetah kuulumah ruadomatkoin aigah kerätyt retseptat.
Karel´´skaja kuhn´a i točka -projektu sai allun mennyt vuon sygyzyl. Tämän ruadomatkan tärgevimänny tapahtumannu rodieu Jyškyjärven kul´tuurutalois 29. pakkaskuudu piettävy vastavus. Pidoh tulijat suajah nähtä perindöllizii kodivehkehii, kuduat pohjazien kylien eläjät annettih 1970-1980-luvul Kižin muzeih ruokos piettävikse.
— Kižin fondois edukädeh kačoimmo, midä on pohjazes eläjien lahjoitettuu. Toinah suau vastavuo lahjoittajien jälgeläzien kel. Toinah hyögi ruvetah jatkamah ielastujoin ruaduo, annetah muzeih kodivehkehty, jatkau Anna Anhimova.
Projektan ruadojoukkoh kuulutah Kižin muzein, Kielien, literatuuran da histourien instituutan, Periodika-julguamon ruadajat. Sego valokuvuajat da videolin luadijat. Pohjazen matkoi autetah hommata vienankarjalazet Marija Urbanovič da Julija Filippova.
Baltiekkumerensuomelazien rahvahien liigan da Kižin muzein yhtehine projektu on suannuh kannatustu Karjalan tazavallan piämiehen grantufondaspäi.
Yhty Oman Median kanualah Telegramas!
