Perindöllizien syömizien kerävömatkat jatkutah
Jatkutah Karel’skaja kuhn’a i točka -projektan kerävömatkat. Vaste ei ammui projektan rahvas käydih Vienan meren rannal olijoih kylih. Täl kerdua kerättih ainehistuo vahnois pomoroin kylis — Virmas, Sumskii Posadas, N’uhčas da Suhoje-kyläs.
Projektan matkois tuttavutah Karjalan kylien paikallizih eläjih, kuduat säilytetäh vahnoi perindölöi. Projektan rahvas kirjutetah heis ennevahnazien syömizien retseptoi, luajitah fotokuvii da videoloi, kuduat ielleh sijoitetah Kuhn’a narodov Karelii -kerävökirjah. Vuokkieniemeh da Kostamukseh käyndäs oli kirjutettu vienankarjalazien perindöllizien syömizien 27 retseptua. Tälgi kerdua 7 Vienan meren rannal eläjäs on kirjutettu 27 retseptua.
— Ylen äijäl miellytti matku. Vienan meren rannal eläjät rahvas ollah ylen rahmannoit da hyvätabazet. Heijän kul’tuuru yksielpäi mustoittau karjalazien kul’tuurua, ga toizielpäi eruou. Heijän kielesgi on meijän sanua, sanommo maksua hyögi sanotah maksakse, ga väitetäh, buitegu se on ihan pomoroin sana. Paginas joga toine sen čuran eläi käyttäy pomoroin sananlaskuloi da sananparziloi. Muga hyvin otettih meidy vastah, ga stolal ei olluh tyhjiä kohtua, kaikkiel oldih syömizet. Da tiettäväine, puutui oppie kaikenmostu kalua. Sanotahhäi pomorat: kalua ku lienne et syönnyh, ga nälgäh jäit, sanoi Oma Mediale Maikki Remšujeva, Oman Muan toimittai.
Projektan tarkoituksennu on luadie muga, ku tazavallan restoruanois da kafeelois paikallizile eläjile da turistoile tarittas syödäväkse Karjalan kandueläjien syömizii. Sikse luajitahgi syömizien retseptoin kerävökirju, kuduah painetah karjalazien, vepsäläzien da Karjalas eläjien ven’alazien syömizien retseptoi.
Projektan ruadojoukon sanoin mugah ruadomatkois on kerätty sen verdu ainehistuo, ku sidä sellittiä da kirjuttua tulou puolen vuottu.
Karel’skaja kuhn’a i točka -projektua todevutetah Karjalan piämiehen grantufondan da Kižin muzein kannatuksel.
Yhty Oman Median kanualah Telegramas!
