Peitettyjen kylien runot: Projekti on lopetettu, ka työ jatkuu
Ortjo Stepanovin šiätijön Peitettyjen kylien runot -projektin toteuttamini piätty. Onnakko projektin ohjuajilla on tulijie työšuunnitelmie.
Ortjo Stepanovin šiätijön Peitettyjen kylien runot -projektin toteuttamini piätty. Šiitä kerrottih projektin ohjuajat järještön VK-šivulla.
— Projektin toteuttamisen aikana keräsimä ta valmistima tietuo Kalevalan piirin 11 peitetyštä kyläštä, pos’olkašta ta huuttorista; kävimä yli 20 šuojelupaikoissa Kalevalan mualla ta pakasima niijen eläjien kera; tuottima Peitettyjä kylie eččimäššä -dokumenttielokuvan, avasima kulttuuri- ta etnoreitin Haikol’ašša ta valmistima mobiilioppahan šitä reittie myöten, kerrottih projektin ohjuajat.
Šamoin projektin rajoissa julkaistih vihkosie ta kalenterija šekä ašetettih muistomerkkijä Kalevalan piirin peitetyistä kylistä.
Vaikka Peitettyjen kylien runot -projekti piätty Ortjo Stepanovin šiätijö jatkau Kalevalan piirin kulttuuriperinnön šäilyttämistä.
— Šuunnittelemma käyvvä ušeimmissa paikoissa Kalevalan piirissä, missä ennein oli kylie, pos’olkkoja ta huuttorija, kerätä ta levittyä tietuo niistä. Meinuamma tavata niijen paikkojen enemmän eläjie ta šuaha tietyä heijän kotimuan juttuja, legendoja ta runoja, kerrotah projektin ohjuajat.
Peitettyjen kylien runot -projekti toteitettih Presidentin granttišiätijön kannatukšella.
Yhty Oman Median Telegram-kanalah!
