Pariskunta Karjalašta mänöy yhteh III Venäjä. Yhistyän šytämie -hiäfestivalissa
III Venäjä. Yhistyän šytämie -hiäfestivali vietetäh 8. heinäkuuta Venäjä- kanšalliskeškukšešša, ilmoittau Karjalan tašavallan piämiehen lehistöpalvelu. Ilmottautunuijen pariskuntien luvušša ollah Aleksandr Kaširin ta Ksenija Värä.
— Yleisvenäläiseššä hiäfestivalissa pariskunnilla tulou yhtehini pruasniekka. Meilä on mielenkiintoista tutuštuo nuorih pariloih toisilta alovehilta ta yheššä julhie šitä tärkietä tapahtumua. Heinäkuun 8. päivänä vietetäh Perehen, rakkahuon ta uškollisuon päivyä, ta on iloista viettyä šitä niijen kera, ket rakaššetah ta arvoššetah toini toista, Aleksandr ta Ksenija šanottih lehistöpalvelulla.
Šulhani on urheilija, runoilija, valmistaja, yhteiskunnallini vaikuttaja, Karjalan tašavallan paraolimpijakomitietan johtaja, Doktor Sport -sosialikuntokeškukšen peruštaja ta johtaja. Antilaš on Petroskoin valtijoyliopiston opaštuja ta Karjalan tašavallan tuki- ta liikuntaelinšairahien henkilöjen urheilufederatijon lehistöšihteri.
III Venäjä. Yhistyän šytämie -hiäfestivali keštäy kakši päivyä. 8. kešäkuuta vietetäh yhtehmänöseremonija kaikilla pariskunnilla. Nuoret šuahah entisiltä ošallistujilta tulta Muromista, missä elettih pyhät Petri ta Fevronija. 9. heinäkuuta nuorilla pariloilla ta toisilla halukkahilla järješšetäh kulttuuriohjelmua.
Hiäfestivalin järještäjinä ollah Venäjä-kanšalliskeškuš, Moskovan halličuš ta Moskovan rekisteritoimisto.
Aihiešta voit lukie niise vepšäkši.
Yhty Oman Median MAX-kanalah!
