”Pakkaine” tulou Priäžän kyläh
Elämä-etnokeskukses ozutetah livvinkieline Pakkaine-suarnu ihan uvvekse vuottu da Rastavakse. Pidoh kučutah 27. talvikuudu 12. 00 čuasun aigah.
— Priäžäläzet inehmizet, kuduat sentämän vuvven käydih karjalan kielen kursiloile, nygöi luajittih Paginkluubu, kuduah kučutah paginkanzakse karjalankielisty rahvastu. Heile tuli mieleh kiändiä livvikse ičeväil Pakkaine-suarnu da ozuttua se kyläläzile da Priäžän gostile, sanoi Oma Mediale Tatjana Seppänen, Elämä-etnokeskuksen piälikkö.
Surnua valmistettih suurel joukol, lavale nostah Marpu da Nastoi, tuatto da muamo, Iivan, kolme pahalastu da Pakkaine. Viijen hengen suuri lapsijoukko — Priäžän školan algukluasoin opastujat ruvetah ozutelmas pajattamah da tansimah.
Ozutelman ohjuajannu on Natalja Gladilina, ruutat valmisti Ol’ga Zaharova. Mollembat naizet ruatah Priäžän etnokeskukses.
”Pakkaine” on karjalan kielen kursiloil opastujien toine ozutelmu. Enzimäzenny oli anukselazen kirjuttajan Valentina Kondratjevan Ystäväzet-kerdomuksien pohjale luajittu ozutelmu.
”Elämä” kuččuu kaikkii Priäžän kylän eläjii da kyläh tulluzii kaččomah ozutelmua da suamah hyviä mieldy uuttu vuottu da Rastavua vaste.
Yhty Oman Median kanualah Telegramas!
