“Pajuntaimen” kuččuu mukavah starinamuajilmah
Afrikkalaisen hiirenpojan kos’s’onta, unkarilaisien kontienpoikasien šeikkailuja, Kintahan miehien viisahuš, šakšalaisen piiruan pakenomini – näistä ta monista muista šeikoista voit lukie nyt karjalakši.
– Pajuntaimen-starinakokomukšen enšimmäini painoš ilmešty vuuvven 2017 lopušša Periodika-kuštantamošša. Karjalan 2017 vuuvven paraš kirja -kilpailušša starinakokomuš voitti heti kahešša nominatijošša: Paraš kirja karjalan, vepšän tahi šuomen kielellä šekä Paraš kirja lapšilla ta nuorisolla. Ka tärkiempänä šuamisena on še, jotta kirja miellytti lukijua ta šai rahvahan hyväkšynnän, koroštau Periodika-kuštantamon johtaja Natalja Sinitskaja.
Starinakokomukšen enšimmäini painoš, mi oli 500 kappalehta, ruttoh loppu, še oli levitetty karjalaisien šekä starinojen ihailijien kešen. Ihmiset ruvettih kyšymäh kirjan toista painošta, ka šen painamiseh miteinkänä ei löytyn varua. Onnakko vuuvven 2020 lopušša Karjalan tašavallan kanšallisen ta alovehellisen politiikan ministerijön rahatuvella starinakokomuš onnistu julkaissa ta varmašti še tulou hyväkši lahjakši monella ihmisellä.
– Pajuntaimen-kirjan tärkevyš on šiinä, jotta še on kakšikielini, vienankarjalan ta venäjän kielet kuletah rinnakkah, mi antau starinakokomukšella mahollisuon löytyä enemmän lukijua. Toisekši, še on lapšilla tarkotettu kirja, a tiijättä vet, jotta lapšien kirjallisutta karjalan kielellä on vähän. Šamoin tärkietä on še, jotta kirja on kanšainvälini, šiitä on esitetty muajilman 44 kanšan 70 starinua, kerto Karjalan tašavallan kanšallisen ta alovehellisen politiikan ministerijön kantakanšojen valtijontuven ošašton johtaja Jelena Migunova.
“Pajuntaimen” on šuuri ta hyvin kaunis kirja. Starinakokomukšen kuvittajana on nuori taiteilija Helli-Maria Palmgren. Hänen lapšien mallissa piiruššetut kuvat autetah lukijua čukeltua mukavah starinamuajilmah.
