Painon ta median yliopiston opaštujat käytih “Periodikašša”
Kirjapainon ta kirjakaupan laitokšen dosentin Ol’ga Starkovskajan johtama opaštujien ryhmä vieraili Petroskoissa ta kävi Periodika-kuštantamošša. Opaššušmatan tarkotukšena on tuttavuštuo uuteh paikkah ta kirjoih, kumpaset šielä julkaissah ta myyvväh.
‒ Yritämmä matkuštua opaštujien kera kakši kertua vuuvvešša toisih kaupunkiloih. Olima Kostromašša, Kazanissa, Murmanskissa ta Petroskoissaki jo olima. “Periodikah” mie tuon eri kurššien opaštujie jo kolmanteh kertah. Tiälä hyvin esitetäh tašavallalla ominaista kirjallisutta, šelitti kirjapainon ta kirjakaupan laitokšen dosentti, filologijan tietojen kandidatti Ol’ga Starkovskaja.
“Periodikašša” opaštujat tiijuššettih, mimmosie kirjoja ta viestimie kuštantamo valmistau, mimmoset vaikeukšet ruavon aikana ollah ta mitein niitä ratkaissah šekä mitä erikoista on kanšallisen kirjallisuon julkaisomisešša.
‒ Tiälä myö tiijuštima runoista, kantakanšojen kulttuurista ta šen jälkeh oli oikein mukava pityä kiäššä kirjoja, kumpasissa nämä teemat esitetäh. Meijän kaikkih kyšymykših oltih mukavat šelitykšet ta vaštaukšet. “Periodika” oikein mielty meilä, šanottih laitokšen opaštujat.
Kirjajulkaisun laitokšien lisäkši opaštujat käytih musiikkiteatterissa, kuvataitomusejošša ta käveltih kaupunkissa. Šemmoset matat voijah panna alkuo ammatilliseh yhteisruatoh tulovaisuošša.
