Paginištund: Tundijad jagoihe parahimil radmahtoil kodikeliden kaičendas
Piteriš mäni paginištund, mitte oli omištadud Piterin agjas eläjiden igähižiden rahvahiden keliden opendamižele. Sil letihe küzundoid, miččed koskiba vähäluguižiden rahvahiden kul’turan da keliden kaičendad da popul’arizoitandad. Opendajad jagoihe mahtištol kodikeliden opendamižes da starinoičiba, kut mel’dütoitaba lapsid ičeze rahvahan tradicijoihe.
— Ezitin ičein radonmahtištod, miččid openduzkirjoid, materialoid kävutan vepsän kelen urokoil. Mugažo starinoičin azjtegoiš, miččed om sidotud vepsän rahvahanke, meiden mediakeskusen polhe, mitte radab meiden školan pohjal, sanui Vologdan agjan Kujan školan vepsän kelen opendai Ol’ga Balaban.
Azjtegoho online-formatas mugažo ühtniba ezitajad Karjalaspäi. Vepsän kul’tursebran pämez’ Larisa Čirkova starinoiči vepsän kelen tugemižes Karjalan valdkundas.
— Kaik meiden idejad tuleba eloho regionaližen da federaližen rahatugen abul. Joga voden mö todenzoitam projektoid, miččed om oigetud školiden, rahvazkundan da valdmehišton kožumižehe. Necen ühthižradon abul lapsil da heiden vanhembil kazvab melentartuz’ kodikel’he, sidä tahtoidas kävutada jogapäiväližes elos, homaiči Larisa Čirkova.
